Madasig kaayo ang paglakat sang mga inadlaw……..sang mga binulan. Daw kasan-o lang atong tini-on nga nag-conduct kami sang isa ka formation activity kung sa diin natukod ang PYM (Parish Youth Ministry). Dated September 2, 2007…
Daw wala lang napaktan. Masulusobra naman gali sa isa ka tuig ang amon pag-ululupod bilang isa ka grupo sang lamharon diri sa aton parokya. Ang ining pag-selebrar namon sang amon nga una nga anibersaryo ginahalad namon sa mga kaparian diri sa aton parokya ilabi na gid ang amon nga una kag ikaduha nga spiritual director, sa grupo sang aton mga missionaries kag sa tanan nga katapo sang aton simbahan nga nagapati gid sa ikasarang sang mga pamatan-on kag wala gid nagakataka sa padayon nga pag-suporta kag pagbulig sa amon. Kung indi tungod sa inyo tanan, ayhan wala man/naman kami subong. Madamo gid nga salamat!
Sa sining kalawigon sang amon pagpanglakaton, madamo ang curious kag may nagtuluhaw nga mga pamangkutanon. Ano na ang inyo mga nabuhat? Ano pa ang inyo pagabuhaton? Ang ina nga mga pamangkot akon pagasabton tubtob sa akon ikasarang.
Sa amon una nga mga binulan, amon gintutukan ang orientation kag organization sang mga kabataan sa mga sitio kag kabarangayan. Amo ini ang una namon nga tikang sa pag-tipon kag pag-bug-os sang pwersa sang pamatan-on diri sa aton parokya. Diri namon ginpabinag-binag sa ila ang mga realidad nga nagakalatabo sa ila palibot nahanungod sa pareho nila nga mga kabataan kag ang sarang nila nga mabuhat agud sila makabulig. Amon gin-paintyindi sa ila ang purpose sang pag-oraganize namon sang isa ka youth ministry nga amo ang pagtugot sa tagsa-tagsa sa ila nga ikabuhi ang Diyos, sa ila mga pulong kag mga buhat, sa matag-adlaw-adlaw nga tanan. Dugang pa sina amo nga ang YM isa man ka pamaagi agud ila madiskurehan kag madevelop ang ila mga kinaadman kag mga ikasarang para mapaambit nila ini sa iban. Natuman man ang eleksyon sang ila mga opisyales. Paagi sining paglibot sang bug-os nga pwersa sang PYM, natukod ang BYM(Barangay Youth Ministry).
Tungod kay may mga representantes na ang mga sitio kag kabarangayan, nagahiwat na kami sang amon nga regular meeting sa kada una nga Domingo sang bulan. Diri naman amon ginaplanuhan ang nagakadapat pa gid namon nga buhaton agud mapabaskog ang amon grupo, madugangan ang amon nga mga miyembro kag padayon namon nga matandog ang pareho namon nga mga pamatan-on pakadto sa husto nga dalan. Nangin sabat sa amon plano ang mga leadership seminars and workshops kag mga formation programs nga ginhatag sa amon sang pila man ka beses. Kag diri na nagsugod ang pakig-bahin namon sa mga programa kag aktibedades sang aton parokaya.
Karon, padayon gihapon ang amon nga pagpanglakaton. Sa sini nga bulan, maga-reach out na naman kami sa mga kabataan sa mga sitio kag kabarangayan agud mag-conduct sang isa ka Youth Encounter agud pasanyugon pa gid ang mga BYM’s. Sa sini man nga Domingo, maga-umpisa man ang amon nga “gathering” kung sa diin magahatag kami sang biskan gamay lang nga tini-on agud magpangamuyo sang ululupod kag patubu-on pa gid ang ispirituhanon nga aspeto sang amon kabuhi.
Sa tanan nga mga ginikanan: “Tugutan kag suportahan naton ang aton mga kabataan.”Sa tanan man nga mga kabataan: “Magbuylog kag masabat kita sa sini nga mga pangagda!”
ni Dannisa Prader
