Kung aton obserbahan ang mga kabataan sa aton palibot sa karon, makita naton ang faction sa ila. May nagkalain-lain nga fraternities, sororities kag youth organizations nga nagatubo sa nanari-sari nga mga institusyon. Ano bala ang ugat sini?
Madamo ang nagasiling nga daku ang mabulig sang grupo sa isa ka indibidwal ilabi na gid sa mga kabataan. Paagi sa pag-intra sa mga grupo, mas nakilala sang isa ka ordinaryo nga pamatan-on ang iya kaugalingon kag nakita kag napaambit ang iya kina-adman kag ikasarang. Nagabulig man ini sa pagtubo sang sosyal nga aspeto sang iya kabuhi.
Apang, kung aton binag-binagon sang maayo, madamu man sang malain nga epekto ang grupo. Tungod sini, nagtuhaw ang pag-hisaay, pag-libakanay kag indi pag-intindihanay nga nagaresulta sang kagamu kag pag-ilinaway. Masami, indi lang ini sa tunga sang isa, duha okun tatlo ka nanari-sari nga grupo kundi sa tunga mismo sang mga miyembro sang isa ka grupo.
Kung aton pamalandungan ang ini nga sitwasyon, marealisar naton nga indi esensyal ang pag-angkon sang kinaiya nga grupo sa kabuhi sang isa ka pamatan-on. Di bala mas maayo kung kita tanan naga-buligay kag naga-ugyon? Kung ang tanan sa aton palibot sarang naton nga madalaganan sa oras sang kapiutan kag nakaintindi kag handa magbulig sa aton? Ano ayhan kanami sang feeling kung kita tanan ululupod sa pagpanglakaton bilang isa ka daku kag mabaskog nga grupo? Wala naga-hisaay,naga-libakanay kag naga-ilinaway. Sa baylo, kita tanan nagahangpanay, naga-paambit sang kinaiya nga ikasarang kag naga-ugyon pakadto sa kamatuoran sang aton mga handom kag kauswagan sang aton kabuhi bilang isa ka kristianong katilingban.
Daku ang aton mahimo para sa kaayuhan kag kasanyugan sang tanan kung bug-os ang aton pwersa sa pag-ubra sang aton mga obligasyon kag pag-atubang sang aton mga problema. Siling gani ni Mattie Stepanek, “Unity is strength. When there is teamwork and collaboration, wonderful things can be achieved.”
-Dannisa Prader
ur blog is very informative, especially to the youth