Indi lipod sa ihibalo sang tanan ang padayon nga pagpanglakaton sa mga kabarangayan sang bug-os nga pwersa sang LPYM (Leganes Parish Youth Ministry) sa paghatag sang pormasyon sa mga kabataan. Sa paghiwat sining Youth Encounter, nagtinguha guid kami nga may mabilin man kami sa mga partisipante sining programa agud ila ikabuhi sa matag-adlaw-adlaw nga tanan. Isa sang amon pokus amo ang pagpatubo sang ginatawag nga “RESPETO”. Respeto sa kaugalingon, sa isig-katawo ilabi na guid sa Diyos.
Sa akon obserbasyon, nangin mabudlay ang dalagan sang duha ka adlaw nga mga aktibidades kung may ara sang isa, duha, ukon tatlo ka mga nag-ilintra nga wala sa huna-huna kag tagipusuon ining pito ka letra nga tinaga. Sa baylo, wala nagapamati, nagaginahod kag wala nagapati sa ginahambal sang mga facilitators. Isa ka bala sa ginatumod ko? (Bato-bato sa langit, ang maigo indi lang mangakig.)
Apang, indi lang sa YE makita ang mga sitwasyon kung sa diin nagakadula na ang respeto. Masami nagakatabo ini sa aton palibot. May respeto bala kita sa aton kaugalingon kung nagahimo kita sang bagay nga makapalain kag makapaguba sa aton? Ginarespeto bala naton ang aton isig-katawo kung ultimo aton mga ginikanan wala naton ginapati, sa baylo, aton ginasabat kag ginabuyayaw? Sa diin ang respeto sa Diyos kung ang tanan nga bugay kag grasya nga ginhatag Niya sa aton, aton lang gina-wasak kag gina-uyangan? Sa makaisa, sa simply lang gani nga pag-abyanay nagakaligtaan naton ang estado sang isa kag isa kag nagakalimtan naton nga ibutang ang aton kaugalingon sa insakto nga lugar.Nagapakita na ina sang pagkadula naton sang respeto nga sa masami indi kita nangin aware.
Sa aton pagtubo bilang tawo, importante guid nga ilakip naton ang pagtubo sang respeto sa aton mga kaugalingon sa ano man nga mga sitwasyon sang aton kabuhi. Si John Gray nagsiling, “When men and women are able to respect and accept their differences, then love has a chance to blossom”. Kung ang mga tawo nagarespetohanay kag ginabaton ang kinalain sang tagsa-tagsa, magapangibabaw ang gugma. Gugma para sa bug-os nga Kristianong katawhan. Kabay unta nga magtubo ang respeto indi lang sa akon, sa imo, kundi sa tanan nga mga tawo sining kalibutan!
